बीडचे तत्कालीन जिल्हाधिकारी अविनाश पाठक यांना अटक,,,

बीड: जिल्ह्याचे माजी जिल्हाधिकारी आणि आयएएस अधिकारी अविनाश पाठक यांना कोट्यवधी रुपयांच्या राष्ट्रीय महामार्ग भूसंपादन घोटाळ्याप्रकरणी अटक करण्यात आली आहे. या कारवाईमुळे संपूर्ण महसूल आणि प्रशासकीय वर्तुळात प्रचंड खळबळ उडाली आहे.
बीड पोलिसांनी लातूर पोलिसांच्या मदतीने त्यांना लातूर येथील त्यांच्या निवासस्थानातून ताब्यात घेतले आहे,
राष्ट्रीय महामार्ग आणि जायकवाडी प्रकल्पाच्या भूसंपादनात शेतकऱ्यांना वाढीव मोबदला देण्यासाठी २४१ कोटी ६२ लाख रुपयांचा घोटाळा झाल्याचा ठपका त्यांच्यावर ठेवण्यात आला आहे.
बनावट कागदपत्रे: पाठक यांची बदली झाल्यानंतरही त्यांच्या नावाचे आणि बनावट स्वाक्षरीचे १५४ जुन्या तारखेतील आदेश निर्गमित करण्यात आले होते.
आर्थिक अपहार: सुमारे ७३ कोटी ४ लाख रुपयांचे प्रत्यक्ष वाटपही संबधित खातेदारांना बेकायदेशीरपणे झाले असल्याचे तपासात निष्पन्न झाले आहे.
तपासाचे धागेदोरे:
SIT चौकशी: या प्रकरणाचा तपास विशेष तपास पथकाद्वारे (SIT) सुरू होता. पोलिसांनी सुमारे २,५०० कॉल रेकॉर्डिंग आणि स्वाक्षरीचे नमुने तपासासाठी पाठवले होते.
सहआरोपी: या प्रकरणात यापूर्वीच १० जणांवर शिवाजीनगर पोलीस ठाण्यात गुन्हा दाखल करण्यात आला असून, त्यात महसूल कर्मचारी आणि वकिलांचा समावेश आहे.
पुढील कारवाई: पोलीस अधीक्षक नवनीत कांवत यांनी अटकेच्या वृत्ताला दुजोरा दिला असून, पाठक यांना बीड न्यायालयात हजर केले जाणार आहे